ನಾ ಕಂಡ ಕೆನಡಾ

ಈ ಪುಸ್ತಕವನ್ನುಓದಿದ ನಂತರ " ಕುಳಿತಲ್ಲೇ ಕೆನಡಾ" ಎನ್ನಬಹುದೇನೋ! ಆ ದೇಶದ ಇತಿಹಾಸ, ಮಹತ್ವ ವಿಶೇಷಗಳನ್ನು ಅಧ್ಯಾಯಗಳ ತಲೆಬರಹದೊಂದಿಗೆ ಸರಳವಾಗಿ ನೀಡಿದ್ದಾರೆ. ಆದೇಶದ ಮುಂದಾಲೋಚನೆ, ಜನತೆಯ ಬಗೆಗಿನ ಕಾಳಜಿ, ಇತರ ದೇಶಗಳ ಯುವಜನತೆಗೆ ಅಲ್ಲಿ ಉತ್ತಮ ಆಶಾದಾಯಕವಾದ ಭವಿಷ್ಯದೊಂದಿಗೆ ನೆಲೆಯೂರಲು ಇರುವ ಅವಕಾಶಗಳ ಸ್ಪಷ್ಟತೆ ಇದೆ. ಅಲ್ಲಿಯ ಅಂಚೆ ಮತ್ತು ತ್ಯಾಜ್ಯವಿಲೇವಾರಿಯ ಅಂಶಗಳು ಹೊಸ ಸೇವೆಗಳನ್ನು ಆಚರಣೆಗೆ ತರಲು ಸ್ಫೂರ್ತಿ ನೀಡುತ್ತವೆ. ಇನ್ನು ಅಲ್ಲಿಯ ವಸತಿ, ಕಟ್ಟಡಗಳ ಸುರಕ್ಷತೆ, ಅಗತ್ಯ, ವೆಚ್ಚ, ಆಹಾರದ ವೈವಿಧ್ಯತೆ, ಹಣಕಾಸಿನ ವಿಷಯಗಳಂತೂ ಉಪಯುಕ್ತವೇ ಸರಿ. ಅಲ್ಲಿಯ ಶೌಚಶುದ್ಧಿಯಂತೂ ಆಚರಣೆಯ ಅನುಮಾನಗಳಿಗೆ ಉತ್ತರದಂತಿದೆ. ಕಡೆಯಲ್ಲಿ ತಮ್ಮ ಸ್ವಂತ ಅನುಭವದೊಂದಿಗೆ ಜೀವನದ, ಜೀವಿಸುವ ರೀತಿಯನ್ನೂ ಮುಕ್ತವಾಗಿ, ಹಾಸ್ಯ ಬೆರೆತ ಅಧ್ಯಾತ್ಮದೊಂದಿಗೆ ಬೆರೆಸಿ, ಹಿರಿಯರಿಗೂ ಸಂದೇಶ ನೀಡಿ, "ಸರ್ವೇಜನಾಃ ಸುಖಿನೋ ಭವಂತು" ಎಂಬ ನುಡಿಯನ್ನು ಕಾರ್ಯರೂಪಕ್ಕೆ ಇಳಿಸಿರುವ ಶ್ರೀ ರಾಮಚಂದ್ರರವರಿಗೆ ನನ್ನ ಹೃತಪೂರ್ವಕ ಧನ್ಯವಾದಗಳು.

ಈ ಪುಸ್ತಕದ ವೈಶಿಷ್ಟ್ಯವೇನೆಂದರೆ, ಅದರಲ್ಲಿನ ಮಾಹಿತಿ ಸಂಗ್ರಹವನ್ನು ವಿಚಾರಾಧಾರಿತವಾಗಿ ಪ್ರತ್ಯೇಕ ಭಾಗಗಳಾಗಿ ಹಂಚಿದಂತೆ, ಓದುಗರಿಗೆ ಬೇಕಾದ ವಿಚಾರಗಳನ್ನು ಸರಳವಾಗಿ ಹಾಗೂ ಸೂಕ್ತವಾಗಿ ಪಡೆಯಲು ಸಾಧ್ಯವಾಗುತ್ತದೆ. ಇದು ಪ್ರವಾಸಿಗರಿಗೆ ನೆಮ್ಮದಿ ಮತ್ತು ಸುರಕ್ಷತೆ ಭಾವನೆಯನ್ನು ಉಂಟುಮಾಡುತ್ತದೆ. ಮೊತ್ತಮೊದಲು, ನೀವು ಅನ್ವೇಷಿಸಬೇಕಾದ ಸ್ಥಳಗಳ ಬಗ್ಗೆ ಪೂರ್ಣ ಮಾಹಿತಿಯೊಂದಿಗೆ ಹತ್ತಿರವಾದ ಪ್ರವಾಸಿ ತಾಣಗಳನ್ನು ತಿಳಿಯಲು ಇದು ಅತ್ಯಂತ ಉಪಯುಕ್ತವಾಗಿದೆ.

ತಮ್ಮ ಪ್ರವಾಸವನ್ನು ಸುಗಮವಾಗಿ ಮತ್ತು ಆಸಕ್ತಿಯಿಂದ ಅನುಭವಿಸಲು ಇದು ಅತ್ಯುತ್ತಮ ಸಹಾಯಕ ಪುಸ್ತಕವಾಗಿದೆ. ನಾನು ಓದುಗರಿಗೆ ಈ ಪುಸ್ತಕವನ್ನು ನಿಜಕ್ಕೂ ಶಿಫಾರಸು ಮಾಡುತ್ತೇನೆ.

ನಾ ಕಂಡ ಕೆನಡಾ ಎಂಬ ಈ ಪುಸ್ತಕವು ಮಾಸ್ಟರ್ ಪದವಿ ಕಲಿಯಲು ಹೋಗುವ ವಿದ್ಯಾರ್ಥಿಗಳು, ಪಿಆರ್ ವೀಸಾ ಮೇಲೆ ಕೆಲಸಕ್ಕೆ ಹೋಗುವವರು ಆ ದೇಶಕ್ಕೆ ಶೀಘ್ರವಾಗಿ ಹೊಂದಿಕೊಳ್ಳಲು, ಈ ಪುಸ್ತಕವನ್ನು ಓದಿದರೆ ಅವರಿಗೆ ಸಹಾಯಕವಾಗುತ್ತದೆ ಎಂದು ನನ್ನ ಅನಿಸಿಕೆ.

“ನಾ ಕಂಡ ಕೆನಡಾ” ಪುಸ್ತಕ ಓದಿದಾಗ, ನಾನೇ ಕೆನಡಾಗೆ ಹೋಗಿ ನೋಡಿದ ಸುಂದರ ಅನುಭವವಾಯ್ತು ಎಂದು ಅಭಿಪ್ರಾಯಿಸಿದರೆ ಅತಿಶಯೋಕ್ತಿಯಾಗದು. ಬರವಣಿಗೆ ಓದಿಸಿಕೊಂಡು ಹೋಗುವುದರ ಜೊತೆಗೆ ಅವಶ್ಯಕವಾಗಿ ಬೇಕಾದ ಎಲ್ಲಾ ಅಂಶಗಳನ್ನು ಹೊಂದಿದೆ, ಅಷ್ಟೇ ಅಲ್ಲದೇ ಕೆನಡಾ ಬಗ್ಗೆ ಸಂಪೂರ್ಣ ಚಿತ್ರಣ ನೀಡುತ್ತದೆ.

ಈವರೆವಿಗೂ ನಮ್ಮ ದೇಶದ ಪ್ರಮುಖ ನಗರಗಳನ್ನೇ ನೋಡದ ನನಗೆ, ವಿದೇಶಕ್ಕೆ ಹೋಗಿ ಬಂದವರು ಅವರ ಆಸಕ್ತಿಗನುಗುಣವಾಗಿ ತಿಳಿಸಿದ ಹಲವು ಮಾಹಿತಿಗಳು ಬಹಳ ವಿಶೇಷವೆನಿಸಿರಲಿಲ್ಲ.

ಆದರೆ, ಶ್ರೀ.ಕೆ.ಬಿ. ರಾಮಚಂದ್ರರವರು ಬರೆದ “ನಾ ಕಂಡ ಕೆನಡಾ” ಪುಸ್ತಕದಲ್ಲಿ ವಿವರಿಸಿದಂತೆ, ಎಲ್ಲಾ ಅಧ್ಯಾಯಗಳಲ್ಲಿ ಪ್ರಸ್ತಾಪಿಸಿದ ಅಂಶಗಳು ಅತ್ಯಾವಶ್ಯಕ ಮಾಹಿತಿಗಳನ್ನು ನೀಡುವುದಲ್ಲದೇ, ಇನ್ಯಾರು ಈ ರೀತಿಯ ಸಮಗ್ರ ಮಾಹಿತಿಯನ್ನು ನೀಡಲಾರರು ಎಂದೆನಿಸಿತು. ನಾವು ಮನೆಯೆಲ್ಲೇ ಕುಳಿತು ಕೆನಡಾದ ಭೂಗೋಳದ ಪರಿಚಯದ ಜೊತೆ ಜೊತೆಗೆ ಮುಖ್ಯವಾಗಿ ಅಲ್ಲಿನ ಸಂಸ್ಕೃತಿ, ಹಣಕಾಸಿನ ವ್ಯವಹಾರ, ಹಬ್ಭಗಳು, ಜನಜೀವನ, ಊರು ಕೇರಿಯ ವಿವರಗಳು, ಪ್ರವಾಸ ಸ್ಥಳಗಳು, ವಿದ್ಯಾಭ್ಯಾಸದ ಬಗ್ಗೆ ಹಾಗೂ ಇತರೆ ಅಂಕಿಅಂಶಗಳು ಜನಸಾಮಾನ್ಯರಿಗೆ ಅರ್ಥವಾಗುವಂತೆ ಇದ್ದು, ನೀಡಿರುವ ಮಾಹಿತಿಗಳು ಸ್ವಯಂ ವಿವರಣಾತ್ಮಕ ನಿಘಂಟಾಗಿದೆ. ಈ ರೀತಿಯ ಮಾಹಿತಿಗಳನ್ನು ಬಹಳ ಶ್ರಮವಹಿಸಿ ಒದಗಿಸಿದ ಶ್ರೀ.ಕೆ.ಬಿ. ರಾಮಚಂದ್ರರವರಿಗೆ ನಮ್ಮ ಹೃತ್ಪೂರ್ವಕ ವಂದನೆಗಳು.

ಪ್ರವಾಸದ ಮೊದಲು ಒಮ್ಮೆಯಾದರೂ ಓದಲೇಬೇಕು. ಹೋಗಬೇಕಾದ ಜಾಗದ ಬಗ್ಗೆ ವಿವರವಾಗಿ ಬರೆದಿದ್ದಾರೆ. ಕನ್ನಡದಲ್ಲಿ ಕೆನಡಾ ಬಗ್ಗೆ ಪುಸ್ತಕವನ್ನು ನಾನಂತೂ ಕಂಡಿಲ್ಲ. ಈ ಪುಸ್ತಕ ಕೇವಲ ಕೆನಡಾ ಅಷ್ಟೇ ಅಲ್ಲ, ಎಲ್ಲಾ ಪಾಶ್ಚಿಮಾತ್ಯ ದೇಶಗಳಿಗೂ ಹೊಂದುವ ಪುಸ್ತಕ. ಅಮೇರಿಕಾ ಜರ್ಮನಿ ಇಂಗ್ಲೆಂಡ್ ಹೀಗೆ ಇಂತಹಾ ಸ್ಥಳಗಳು ಪ್ರವಾಸಿಗರಿಗೆ, ಓದಲು ಹೋಗುವವರಿಗೆ ಒಳ್ಳೆಯ ಮಾಹಿತಿ.